MANILA, Philippines - Wala pa ring tatalo sa FEU-Nicanor Reyes Medical Foundation.
Pinabagsak ng FEU-NRMF ang defending champion Macway Travel Club, 72-65 para sa ika-apat na dikit na panalo sa 2016 MBL Open basketball tournament sa Trinity University of Asia gym sa Quezon City.
Nagpasiklab sina Fil-Canadian sensation Clay Crellin, Egay Billones at Rene Boy Banzali upang pangunahan ang FEU-NRMF sa isang makapigil-hiningang sagupaan na tila nagsilbing preview ng darating na title showdown.
Si Crellin, ang 6-4 forward na naglaro rin sa Vancouver Balloholics sa Canada, ay umiskor ng 13 puntos kabilang ang back-to-back three-point shots sa third quarter.
Nag-ambag sina Billones at Banzali ng tig-10 puntos, bukod pa ang mahusay na playmaking para sa FEU-NRMF sa kumpetisyon na itinataguyod ng Smart Sports, Ironcon Builders, Star Bread, Dickies Underwear at Gerry’s Grill.
Sa unang laro, naungusan ng Emilio Aguinaldo College ang Philippine Air Force, 74-70 sa isa pang hitik sa aksyon na labanan.
Humirit si Jethro Mendoza ng siyam sa kanyang 14 puntos sa fourth quarter upang tulungan ang Jet Force sa panalo.