MANILA, Philippines – Sampung rekord pa ang nawasak sa ikalawang araw ng 89th Philippine Swimming League (PSL) National Series-Mayor Romulo “Kid” Peña Swim Meet sa Makati Aquatic Sports Arena sa Makati City.
Hindi nagpaawat si Female Swimmer of the Year top candidate Micaela Jasmine Mojdeh ng Immaculate Heart of Mary College-Parañaque nang bumasag pa ito ng tatlong bagong marka sa girls’ 9 years category.
Pinag-reynahan ni Mojdeh ang 100m breastrtoke (1:33.81), 50m freestyle (33.25) at 50m breaststroke (42.85) upang higit pang paningningin ang kanyang kampanya. Nauna nang binura ni Mojdeh ang rekord sa 50m butterfly sa bendisyon ng 34.04 na kanyang naitala.
Bumanat din ng tig-dalawang bagong marka sina Heather White ng British School of Manila (girls’ 8 200m Individual Medley, 3:18.36, at 50m freestyle, 35.06) at Kyla Soguilon ng Aklan (girls’ 11 50m butterfly, 32.06, at 50m freestyle, 30.24) sa kani-kanilang events.
Nagparamdam din ng lakas sina Joey Del Rosario ng De La Salle-Zobel (boys’ 50m freestyle, 34.18), Jerard Dominic Jacinto ng University of the East (boys’ 14 200m backstroke, 2:22.09) at Finn Jason Lock ng Aqua Bats (boys’ 9 100m breaststroke, 1:41.15).