MANILA, Philippines – Pangungunahan nina Most Valuable Players Kiefer Ravena ng Ateneo de Manila University at Allwell Oraeme ng Mapua Institute of Technology ang Collegiate Mythical Five awardees sa UAAP-NCAA Press Corps Collegiate Basketball Awards na gaganapin sa Enero 26 sa Saisaki-Kamayan sa Greenhills.
Kasama nina Ravena at Oraeme sina Mac Belo ng Far Eastern University, Kevin Ferrer ng University of Santo Tomas at Scottie Thompson ng University of Perpetual Help System Dalta.
Nasungkit ni Ravena ang kanyang ikalawang sunod na UAAP MVP award upang kahit papaano ay maging engrande ang pagtatapos ng kanyang college basketball career.
Sa kabilang banda, si Oraeme ang itinanghal na MVP at Rookie of the Year sa NCAA. Dinala niya sa Final Four ang Cardinals sa unang pagkakataon sapul noong 2010.
Naging katuwang naman ng Tamaraws si Belo para tuldukan ang isang dekadang pagkauhaw at makamit ang ika-20 titulo ng koponan sa liga habang si Ferrer ang runner-up sa MVP race.
Bagamat bigong dalhin ang kanyang tropa sa Final Four, matikas ang ipinamalas na husay ni Thompson sa nakalipas na taon kung saan halos mapantayan na nito ang kanyang MVP performance noong 2014.
Si Thompson ay kasalukuyan nang naglalaro sa PBA para sa Barangay Ginebra.
Makakasama ng Collegiate Mythical Five sa listahan ng mga awardees sina Nash Racela ng FEU at Aldin Ayo na dating Letran coach at kasalukuyan nang mentor ng De La Salle University, na siyang gagawaran ng Coach of the Year awards.
Pasok din sina Roger Pogoy ng FEU at Kevin Racal ng Letran para sa Pivotal Player award at sina Baser Amer ng San Beda College, Mark Cruz ng Letran at Mike Tolomia ng FEU para sa Super Senior honors.