MANILA, Philippines - Makakatapat ni Donnie Nietes ang matibay na Mexicano na si Juan Alejo sa kanyang unang laban sa US na gagawin sa StubHub Center sa Carson, California sa Oktubre 17.
Hindi pa natatalo sa halos 12 taon, itataya ni Nietes ang hawak niyang WBO light flyweight title kontra kay Alejo na wala pang talo sa huling anim na taon.
“It should be a good fight for Donnie because Alejo is ranked seventh or eighth by the WBO. He hasn’t lost in six years,” wika ni ALA Promotions president Michael Aldeguer.
Natalo si Alejo sa kanyang unang tatlong laban, dalawa rito ay sa pamamagitan ng knockouts.
Ngunit ang huling talo niya ay nangyari noon pang Disyembre, 2009 at rumatsada siya ng 21 sunod na panalo.
Impresibo man ang fight record ay angat naman sa karanasan si Nietes na mayroong 36 panalo sa 41 laban.
Ito rin ang unang pagkakataon na lalabas ng Mexico si Alejo at unang laban matapos ang 10-round split decision panalo kay Jose Rivas noong Mayo 27.
Ito ang unang fight card sa US ng ALA at tataguriang Pinoy Pride: Filipinos Contra Latinos.
Sina Albert Pagara at Mark Magsayo ang mga stablemates ni Nietes na posibleng masama sa bakbakan.