MANILA, Philippines – Ikalimang sunod na panalo ang target na dagitin ng Ateneo Eagles sa pagtatapos ngayon ng Spikers’ Turf Collegiate Conference elimination sa The Arena sa San Juan City.
Kaharap ng Eagles ang St. Benilde Blazers sa huling laro dakong alas-5 ng hapon at kung maisakatuparan ang misyon ay sasamahan ng UAAP champion ang National University Bulldogs sa itaas ng standings papasok sa quarterfinals.
Bibitbitin ng walong lulusot na koponan ang kanilang baraha sa elimination round sa quarterfinals kaya’t asahan na gagawin din ng Blazers ang lahat para makuha ang panalo at mapag-ibayo ang kasalukuyang 2-2 baraha
Paglalabanan muna ng La Salle Archers at UP Maroons ang ikalawang puwesto sa Group B sa unang laro sa ganap na ala-1 ng hapon habang ikatlong panalo sa limang laro ang hanap ng NCBA Wildcats sa pagbangga sa wala pang panalong UE Warriors dakong alas-3 ng hapon.
Ang format ng quarterfinals sa ligang inorganisa ng Sports Vision at handog ng PLDT Home Ultera ay isang single round robin ngunit hindi na magkikita ang mga magkakagrupo para madetermina ang apat na koponan na papasok sa semifinals.