MANILA, Philippines - Lumakas ang pag-asa nina Liza del Rosario at Engelberto “Biboy” Rivera na mapasama sa Top 24 matapos magpakita ng magandang laro sa QubicaAMF Bowling Cup sa Sky Bowling Center sa Wroclaw, Poland.
Nagpagulong si Del Rosario ng five-game series na 1126 pinfalls at nagtala naman si Rivera, dating world FIQ champion na naglalaro sa kanyang ikatlong international finals sa nasabing individual kegfest, ng 1128 para upuan ang second at third places, ayon sa pagkakasunod.
Pumangalawa si Del Rosario, dating world trios titlist, sa women’s division sa kanyang 15-game total na 3430 para sa 228.67 average sa ilalim ni Brittni Hamilton ng United States na abante ng 22 pins.
Nasa ikatlo naman si Rivera sa men’s class sa kanyang 3458 sa 15 games. Si Tobias Bording ng Germany ang nangunguna sa kanyang 3677 kasunod si Mykhaylo Kalika (3475) ng Ukraine.
Ang mga natitirang contenders mula sa 70 bansa ang maglalaban para sa top eight spots kung saan ang top three bowlers ang aabante sa top three na mag-aagawan sa korona.