La Salle, UST nakatutok sa ika-4
MANILA, Philippines - Ang ikaapat na sunod na ratsada ang parehong hangad ng Archers at Tigers sa kanilang pagharap sa magkahiwalay na karibal.
Lalabanan ng nagdedepensang La Salle ang minamalas na UP ngayong alas-2 ng hapon, habang makakatapat ng UST ang Ateneo sa alas-4 sa eliminasyon ng 77th UAAP men’s basketball tournament sa Smart Araneta Coliseum.
Hawak ng NU ang liderato sa kanilang 5-1 record kasunod ang Ateneo (4-1), UST (3-1), La Salle (3-2), FEU (3-2), UE (2-3), Adamson (0-5) at UP (0-5).
Mula sa 0-2 panimula ay kumamada ang Archers ng tatlong sunod na panalo, ang huli ay nang talunin ang Falcons, 67-48, noong Sabado.
Sa nasabing panalo ay kumamada si rookie guard Kib Montalbo ng career-high na 18 points para sa koponan ni coach Juno Sauler.
Nasa isang 26-game losing slump naman ang Fighting Maroons sapul noong 2012.
Sa ikalawang laro, pipilitin ng UST na duplikahan ang kanilang 73-57 paggupo sa UP sa kanilang pagbangga sa Ateneo, umiskor ng 81-78 panalo kontra sa FEU noong Linggo.
“Umpisa pa lang ito. We have a goal na makapasok ulit sa Finals, kaya araw-araw pa rin, hard work pa rin,” wika ni rookie coach Bong Dela Cruz sa tatlong sunod na panalo ng kanyang Tigers.
- Latest
