Pilipinas tatayong host sa pulong ng Olympic Council of Asia sa Jan. 17-18

MANILA, Philippines - Magiging punong-abala ang Pilipinas sa loob ng da­lawang araw sa pagpupu­long ng Olympic Council of Asia (OCA) na gagawin sa Hotel Sofitel at Philippine In­ternational Convention Cen­ter sa Pasay City.

Mangunguna sa pulong ang pangulo ng OCA na si Sheikh Ahmad Al-Fahad Al-Sabah  ng Kuwait, habang ina­asahang magpapadala rin ng kinatawan ang 44 na iba pang kasaping bansa sa pagpupulong na gagawin mula Enero 17 at 18.

Ang nasabing pagtitipon ay dapat isinagawa no­on pang Nobyembre at tinagurian pang Asian Games Centennial Festi­val sa Boracay bilang pag­gunita ng 100 taon ng pag­kakatatag ng Asian Games.

Hindi natuloy ang seleb­rasyon sa Boracay  matapos ang paghagupit ng Su­per typhoon Yolanda (Haiyan) noong Nobyembre 8 sa Kabisayaan na kumitil ng humigit-kumulang na anim na libong tao.

Sa Pilipinas nagkaro­on ng buhay ang Asian Games dahil noong Pebrero 1913 ginawa ang kauna-unahang multi-sports event sa Asia na nakilala bilang Far Eastern Championship.

Noong 1951 ay binago ang pangalan patungo sa Asian Games nang ginawa ang palaro sa New Delhi, In­dia.

“It will be some sort of com­memoration ng birth of the Asian Games,” wika ni POC 1st vice-president Joey Romasanta.

Inalis na ang naunang magarbong pagtatanghal na naunang plano at sa ha­lip ay isang welcome dinner na lamang ang gagawin ng POC.

“Ang mangyayari na la­mang ay isang welcome dinner sa January 17 na may Filipiniana show,” dagdag ni Romasanta.

Magdaratingan ang mga delegado sa  Enero 16  at kinabukasan ang unang araw na pagpupulong.

Ang Financial Committee, Environmental Committee, Culture Committee at Rules Committee ang mga mauunang magpupulong mula ika-9 ng umaga, ha­bang sa ganap na alas-12 ng tanghali gagawin ang OCA Executive Board Meeting.

Sa Enero 18 sa PICC sa ganap na alas-10 ng uma­ga gagawin naman ang 32nd OCA General Assembly.

Magsisibalikan ang mga delegasyon sa ka­nilang bansa sa gabi ng Ene­ro 18 o sa umaga ng Ene­ro 19.

Tumutulong ang Philippine Sports Commission (PSC) para maayos na maisagawa ang pagpupulong.