Slammers tinuhog ang Dragons

MANILA, Philippines - Nagtulong sina Froilan Baguion at Chris Charles para ibigay sa Chang Thailand Slammers ang ikalawang dikit na panalo sa paggapi sa Westports Malaysia Dragons, 77-65, noong Sabado sa 4th ASEAN Basketball Laegue sa MABA Stadium, Malaysia.

Matapos ang 15 puntos at 13 assists sa unang panalo ng Slammers sa Singapore Slingers, 65-62, ang 5’7 na si Baguio ay naghatid ng 23 puntos, kasama ang apat na tres.

Tila kulang pa ito dahil ang beteranong pointguard ay mayroon pang 8 rebounds, 7 assists at 2 steals para sa isang all-around game.

Panuporta ito kay Char­les na may kahanga-hangang 29 puntos at 27 rebounds, bukod sa apat na blocks at 2 steals sa walang palitang paglalaro.

Ang solidong laro ng dalawang nabanggit ang tumabon sa malamyang apat na free throws lamang mula kay Michael Earl at ang Slammers ay buma­ngon tungo sa 2-4 baraha.

Nagpakawala ng tres si Baguion habang nagdomina sa ilalim si Charles para ibigay sa bistang Thai team ang 66-55 kalamangan.

Ito ang ikatlong sunod na paglagapak ng Dra­gons matapos ang dalawang dikit na panalo para makatabla ang Slammers ikaapat at limang puwesto.