Karapatan ng ama

KUNG ang pinag-uusapan ang pag-aaruga sa bata, laging inuuna ang kapakanan ng bata. Ang bawat magulang at pamilya ay nagnanais na mabigyan ang kanilang anak ng ma­ayos na buhay, kaya’t minsan ay ipinagkakatiwala ang pagpapalaki ng bata sa mga taong may kakayahan, kahit hindi sila ang mga magulang.

Ngunit sa kasong ito, makikita natin ang kahalagahan ng karapatan ng sariling magulang sa pag-aalaga ng kanilang anak.

Si Jona ay nag-iisang anak nina Lito at Mina, na parehong maagang nagretiro sa kanilang trabaho. Mahal na mahal nila ang kanilang anak, kaya’t nang umibig ito kay Berto, isang ordinaryong manggagawa, hindi sila tumutol.

Naniniwala ang mag-asawa na sa kanilang ipon at mga ari-arian ay kaya nilang suportahan si Jona at ang magiging­ pamilya nito. Para sa kanila, mas mahalaga ang pagma­mahal at kaligayahan ng anak kaysa sa estado o hanapbuhay ng mapapangasawa nito.

Ngunit sa kasamaang palad, namatay si Jona nang ma­nganak dahil sa komplikasyon ng hemorrhage. Dahil dito, pan­samantalang inalagaan ng mga lolo at lola ang isinilang na anak.

Sa ganitong sitwasyon, lumitaw ang isang problema: sino ang tunay na may karapatan sa bata, lalo na’t hindi agad makasama ng ama ang anak?

Upang hindi maging pabigat sa pamilya ng kanyang asawa, umalis si Berto upang maghanap ng trabaho. Layunin niya na maging handa at kayang alagaan ang anak kapag siya ay bumalik.

Ipinakita nito ang kanyang determinasyon at pagmamahal bilang ama, kahit na sa gitna ng kahirapan at pagsubok, handa siyang gawin ang lahat para sa kapakanan ng kanyang anak.

Makalipas ang tatlong buwan, bumalik si Berto upang kunin ang kanyang anak mula kina Mang Lito at Mina. Ngunit tumanggi ang mga ito na ibigay ang bata, dahil naniniwala silang mas mabibigyan nila ng magandang kinabukasan ang kanilang apo.

Sa kabila ng kanilang intensIyon, malinaw na may pangunahing karapatan ang ama bilang tagapag-alaga ng bata, na pinagtibay ng hukuman sa ganitong mga kaso.

Ayon sa batas, ang pagiging mahirap ng isang magulang ay hindi dahilan upang ipagkait sa kanya ang karapatang mag-aruga sa sariling anak.

Mas mahalaga ang legal at natural na karapatan ng ama sa kanyang anak kaysa sa kagustuhan ng mga lolo at lola, kahit na may kakayahan silang magbigay ng mas maginhawang buhay. (Cunanan v. Reyes, L-7710-R, Feb. 7, 1952; Bacayao vs. Calun, 53 O.G. 8607).