Police visibility, job number one

LAGI kong sinasabi, police visibility is job number one. Dapat ang presensiya ng pulis nakikita at nararamdaman.

Kapag ang pulis kalat sa lansangan, mabilis silang ru­mesponde, madali silang lapitan. Ang mga kriminal mag­da­dalawang-isip muna bago isagawa ang kanilang aktibi­dades. 

Nakikita, mabilis rumesponde, madaling lapitan dito ma­­bubuo ang tiwala ng taumbayan sa kapulisan.

Sa maikling salita, police visibility is crime prevention. Bago pa man mangyari ang krimen, napipigil na agad. Walang puwang ang mga halang ang bituka na gumawa ng anumang kriminalidad.

Kaakibat ng police visibility, importante rin na dapat ang nasa itaas ginagalang, kinakatakutan. Lider na disciplinarian­ at strikto pero patas at parehas. Tinitingnan niya ang kapa­kanan ng buong hanay ng  kaniyang pinamumunuan. 

Hinihiwalay ang mga bugok na itlog sa mga matitino. Pinarurusahan ang dapat parusahan. Binibigyan ng pa­buya at inaalagaan ang mga magagaling na pulis at tapat sa ser­bisyo.

Bilang pinuno, tinitiyak rin niya na mayroong regular na retraining program sa kapulisan nang sa ganun hindi sila pumurol at maging patola sa pagpapatupad ng batas.

 Bago na ang hepe ng PNP. Kasabay ng pagkakaluklok­ sa puwesto kay Gen. Benjamin Acorda ang kanyang pana­wagan sa publiko at sa media. Suportahan daw ang kani­lang institusyon. Tama siya.

Sa kanyang panawagang ito, magiging kabahagi ng solusyon ang BITAG at #ipaBITAGmo. Hindi kami tutuligsa pero magsasalita kami kapag may nakita kaming mali at kakulangan na dapat tuwirin at punuan. Magmamatyag kami sa estilo ng pamumuno ni Acorda.

Totoo, ang bawat lider ay may kanya-kanyang brand of leadership. Pero iisa lang ang template at mandato ng pulisya. Protektahan at pangalagaan ang kapakanan at kaligtasan ng mga mamamayan.

Mangyayari ito kung ang mga pulis ay madaling lapitan at madaling rumesponde. Paigtingin ang police visibility!