Magpapaalam na nasa Malacañang
Magwawakas na rin ang “tuwid na daan”;
Kaya ang Kongreso huwag malimutan
Nagpasa nang malaking pondong pambayan!
Mahigit sa 3-T ang pondong ginawa
Kaya ang Pangulo ay waring masaya
Sa reaks’yon nito siya’y tuwang-tuwa
Pero milyung tao ngayo’y lumuluha!
Paanong di iiyak mga dukhang tao –
Sila’y aping-api sa malaking pondo;
P62.6-M pondo lang ang sigurado
Sa Pantawid Pamilyang Pilipino!
Ito’y pondong pagkaliit sa marami
Nating mga dukha at lubhang api;
Na mga biktima ng bagyo at daluyong
Sa Tacloban at lindol sa Bohol at Leyte!
Ang Yolanda victims wala pang tahanan
Mga tao’y nagtitiis sa init at ulan;
At ngayong parating salot na tag-araw
Sa malupit na El Niño ay mahihirapan!
Dapat ngayo’y kumilos na ang administrasyon
Pagka’t malapit na pambansang eleks’yon;
Kung sila’y makupad at kikilos pagong
Ang mga kakampi sa boto ay gutom!
Ngayon ang panahon ating mga dukha
Sa malaking pondo tumatanggap ng awa;
Hindi palagi nang api’t maralita
‘Tawid pampamilya’ – propaganda yata!
Sa programang ito ang makikinabang
Ay mga senador at mga kongresman-
Tiyak may pork barrel uli sa ibang pangalan
Sa galing at magic ni Abad at Soliman!