Kailan babalik?

Kailan babalik ang kapayapaan

na dati’y laganap sa loob ng bayan?

Mga bata’y naglalaro sa mga lansangan

na di natatakot ang mga magulang?

Kailan babalik ang dating panahon

bagyong nagdaraan medyo mahinahon?

Ang hanging habagat kung narito noon

kahit nasa bansa’y di katulad ngayon?

Kailan babalik sa ating gobyerno

na di magnanakaw mga pulitiko?

Salapi ng nasyon na para sa tao

inuubos nila sa kunwa’y proyekto?

Kailan babalik pagb’yahe ng tren

sasakyan ng tao, gulay at pagkain?

Hindi naglalagay mga bus owners

kung kaya maluwag ang mga landasin?

Kailan kikilos ating mga pulis

laban sa gawai’t mga misyong panis?

Police scalawags tawag na makinis

sobra na ang yaman ayaw pang umalis?

Kailan babangon ating mahihirap

na ang laging hintay buhay na maluwag?

Kanilang tahanan na laging pangarap

hindi maibigay ng gobyernong huwad?

Kailan babalik sa tuwid na daan

ang pangulo ngayon nitong ating bayan?

Laging nasa labas at pinapayagan

mga kaalyado na nagpapayaman?

Kailan babalik sa administrasyon

magandang palakad ni President Quezon?

Pangulong Magsaysay nang pinuno noon

kalaban ng batas ay kanyang nalipol?