Anong dapat gawin ng mga mahirap
ngayong bigumbigo ang mga pangarap?
sila’y nanalunton sa tuwid na landas
pero ang naroon ay maraming ahas!
Doo’y nakita rin ang b’yahe ng tren
sa mga probins’ya di na dumarating;
mga daambakal pawang kalawangin
sa tambak na pera ng mga bus owner!
Tahanan ng dukha sa tabing estero --
sabi’y ililipat sa tahanang bago;
pero hanggang ngayon pawang delikado
pagkat di natupad ang mga pangako?
Pagdaan ng bagyo at malaking baha
mga bahay, tao tiyak ang pinsala;
maraming pamilya ang magsisiluha
dahil sa nagkulang ang namamahala?
Sa bayan at nayon at pook na liblib
mga nakatira’y hindi umaalis;
pagyanig ng lupa lubhang mapanganib
natibag na bundok -- libingang mapait!
Libu-libong tao ngayo’y naghahanap
ng mga gabaho na lubhang mailap;
kahit mapanganib ay kanilang tanggap
trabaho sa abroad na dito ay salat!
Kaya anong buhay ang darating kaya
sa mga mahirap na ngayo’y kawawa?
wala silang bahay at pagkai’y wala
tulad ng nangyari doon sa Visayas?
Kailan kikilos ang nasa gobyerno
na ang mahihirap ay tulungan ninyo?
pera at donasyong napunta sa inyo
di dapat napunta sa iilang tao!