Victory Joe! Victory Joe! Sigaw ng mga tao
nang dito’y dumating mga Amerkano;
Nagtagumpay sila sa digma ng siglo
at tayo’y naligtas sa gulo ng mundo!
Lumipas ang ilang mahabang panahon
mga Amerkano’y kaibigan noon;
Kabuhayan nati’y biglang nakaahon
sa tulong ng Kano’t dolyar na bumalong!
Ang tanggulang bansa ay naging malakas
sa bases ng US na dito’y natatag;
Maraming gawaing dito ay kumalat
sa tulong ng Kano na naging matapat!
Subali’t nagbago mga Pilipino
nag-iba ang sigaw: Alis d’yan, Alis kayo;
Mga makabayan nabago ng gusto
mga US bases alisin na rito!
Sa maraming dako’y biglang nagsulputan
mga lider nating sabi’y makabayan;
Mga pulitiko’y nagkunwang maalam
ang habol lang pala ay boto ng bayan!
Dumating ang araw bansa’y inaapi
nang malaking bansa na ating katabi;
Kaya tayong lahat ay maduduhagi
dahil nawala nga ang ating kakampi!
Ang kakampi nati’y bansang Amerika
sila’y pinalayas nitong makabansa;
At ngayon ngang sila ay biglang nawala
mga kawal nati’y makalaban kaya?