Nasaan ang ayuda?

Bakit ang biktima ng bagyong Yolanda

Hindi dinaratnan ng tamang ayuda?

Tacloban at Samar, ngayo’y nakanganga

Pagka’t walang datung para sa kanila?

Dumagsa ang tulong nang maraming tao

Nagmamalasakit mga tagarito;

Nagbibigay na rin halos buong mundo

Pera at pagkain ang dalang regalo!

Mga Pilipino at mga dayuhan

Kumikilos sila at nagtutulungan

Tapat ang hangarin sana’y mabawasan

Ang hirap at dusa ng Kabisayaan!

Subalit nasaan kailangang tulong

Hindi dumarating at waring natapon?

Tulong ng gobyerno’y naglalaho ngayon

Sagip kapamilya ang tanging naroon!

Nasaan ang pondong naipon ng PDAF

Na dating pork barrel nitong mambabatas?

At  saka ang pera ng nagpapalakad

Bakit di ibigay sa salanta at hirap?

At nasaan ngayon pera ng dayuhan

Na sabi’y bilyon nang dapat ipamigay?

Bakit hanggang ngayo’y pinag-uusapan

Sa ating Kongreso ang pondong nalaan?

Ito ba’y dapat pang itago sa lahat

Lalo na sa ating binagyo at salat?

Kung calamity fund ibigay na agad

Upang masiyahan mga naghihirap!