Darami ang mawawaldas

Aprubado’t pinagtibay –

Halos tatlong trilyon na pambansang badyet;

Ito’y higit na malaki

Sa naunang mga badyet na nakagigipit!

Okey lamang ito dahil

Lubhang kailangan nitong sambayanan;

Upang ito’y isaklolo

Sa mga nasalantang nayon at bayan!

Ang binagyo at nilindol

Ay dapat tulungan ng ating gobyerno;

Kaya badyet na malaki

Dapat makasapit  sa maraming tao!

Ang balita’y di maganda –

Kalahati ng badyet ay mapupunta

Sa pork barrel ng pangulo

Kongresista’t kaalyado ang magkakapera!

Kung ito ang mangyayari

Ang PDAP at ang scam ay magsusulputan

Libu-libong mga tao

Ang gaya ng dati ay mahihirapan!

Sana’y di ito maganap

Para lahat tayo’y sagana ang buhay;

At di tayo aasa pa

Sa bigay ng mga taga-ibang bayan!

Mga bansa sa malayo

Dahil sa trahedya’y nagbigay ng pilak

Idagdag pa ito sa badyet

Lalo pang darami perang mawawaldas!