Maselan ang paksang inyong babasahin
pagka’t pulitika – nangyari sa amin;
Dalawang pamilya na kapwa magaling
sa tuwing eleks’yon magkaribal mandin!
Palitan sa pwesto ang dalwang pamilya
partido KBL at Nacionalista;
Ang sistemang ito ay dinatnan ko na
kaya kami’y panig na lagi sa iisa!
Habang nagtatagal sa naturang bayan
mga kandidato ay nagsusulputan;
Sila’y kumakampi at kumakalaban
sa panghuling mayor na anak ng bayan!
Mga pulitikong dati ay kakampi
nagpaksyon na iba’t lumaban sa dati;
May mga naghangad na maging alkalde
di nila kinaya taong may balwarte!
Ang marapat sanang ginawa ng iba
sa pwestong nakamit pinagbuti nila;
Mahirap talunin ang dati ng bida
saka tao itong maraming nagawa!
Maraming pagsira ang kanyang tinanggap
sa pangatlong upo ay hindi raw dapat;
Pero nang bilangin ang botong matapat –
sa dami ng boto’y panalong landslide!
Kaya sa politics ang dapat tandaan
kung mag-aambisyon ay hinay-hinay lang;
Kayo ba ay orig o mga dayuhan
na gustong maghari sa hindi kabayan?