Mall museum ng Lucky Chinatown Mall, nasunog

MANILA, Philippines — Nasunog ang mall museum ng Lucky Chinatown Mall sa Binondo, Manila, kahapon ng umaga.

Batay sa ulat ng Manila Bureau of Fire Protection (BFP), sarado pa ang mall, na matatagpuan sa Reina Regente St., nang magsimulang sumiklab ang sunog sa ikaapat na palapag nito, dakong alas-6:45 ng umaga.

Kaagad namang nakaresponde ang mga bumbero upang apulain ang apoy.

Umabot lamang naman ng unang alarma ang sunog bago tuluyang naideklarang fire out dakong alas-8:51 ng umaga.

Wala rin naman iniulat na nasaktan o nasawi sa nabanggit na sunog.

Inaalam pa ng mga imbestigador ang sanhi ng sunog, gayundin ang halaga ng mga ari-ariang napinsala nito.