P11 bilyon nasabat na fake products ng BOC, ‘ire-recycle’ – CCW

MANILA, Philippines — Nagpahayag ng pangamba ang Citizen Crime Watch (CCW) sa umano’y posibleng “recycling” sa P11-bil­yong halaga ng mga nakum­piskang pekeng produkto ng Bureau of Customs (BOC).

Ayon kay CCW National President Diego Magpantay, hanggang sa ngayon ay tuloy ang ligaya ng mga sangkot sa korapsiyon sa BOC kung saan kabilang sa umano’ y “nire-recycle” ay mga vape products na nagkakahalaga ng P500 milyon.

Batay sa nakalap nilang impormasyon, halos ubos na ang mga ito at ibinenta na nang paunti-unti na minamanipula umano ng alyas “Nan” at alyas “Den” na mga tauhan ng BOC.

Noong nakaraang linggo nang makumpiska ng BOC sa Binondo, Maynila ang nasa P11 bilyong halaga ng mga pekeng produkto.

Istratehiya umano nina alyas Nan at alyas Den na mag-isyu ng “safekeeping order” sa Condemnation Faci­lity sa pamamagitan ng isang Mission Order.

Hiling ng grupo, isagawa ang inventory sa warehouse ng RCU Condemnation kung saan dinala ang mga vape para sa safekee­ping.

Naniniwala rin ang grupo na dapat tutukan ng administrasyong Marcos ang korapsyon sa BOC lalo pa’t hindi umano natatakot ang mga smugglers dahil sa matinding “lagayan”.