MANILA, Philippines — Apat na dayuhang Hapones na pawang itinuturing na pugante sa Japan dahil sa iba’t ibang krimen, ang naaresto ng mga tauhan ng National Capital Region Police Office at Bureau of Immigration (BI) Fugitive Search Unit (FSU).
Ayon kay Rendel Ryan Sy, ng BI-FSU, ang mga Japanese na sina Ueda Koji, 27, Kiyohara Jun, 29, at Suzuki Seiji, 29, ay naaresto sa isang subdibisyon sa Parañaque City habang kababayang si Sawada Masaya, 39, ay naaresto naman sa Ninoy Aquino International Airport (NAIA) Terminal 3.
Nabatid na sina Ueda, Kiyohara at Suzuki ay inaresto sa pamamagitan ng isang mission order na inisyu ni BI Commissioner Norman Tansingco, matapos na makatanggap ng impormasyon mula sa Japanese government hinggil sa mga krimeng kinasasangkutan ng mga ito.
Sinabi naman ni NCRPO chief Police Major General Jose Melencio Nartatez, ikinasa ang operasyon sa pakikipag-ugnayan sa Immigration authorities laban sa nasabing apat na wanted na nagtatago sa bansa.
Base sa rekord, ang apat ay mayroong warrants of arrest simula pa noong Mayo 2024 na inisyu ng Omiya Summary Court dahil sa fraud na paglabag sa Japanese Penal Code.
Anang BI, ang apat na dayuhan ay sinasabing pawang founding members ng isang telecom fraud syndicate na nakabase sa Cambodia na may kinakaharap na mga kasong Unlawful Capture, Confinement, Extortion, at Fraud.
Pawang nahaharap na ang apat na dayuhan sa deportation dahil sa pagiging undesirable aliens.