MANILA, Philippines — Itinakda na ng Department of Education (DepEd) ang pagdaraos ng Brigada Eskwela para sa School Year (SY) 2024-2025 sa Hulyo 22, 2024. Batay sa Memorandum No. 33-2024, na inilabas ng DepEd kamakalawa, magtatagal ang Brigada Eskwela hanggang sa Hulyo 27 lamang.
Ang tema ng naturang aktibidad ngayong taon ay “Bayanihan para sa Matatag na Paaralan.
Isasagawa ang National Brigada Eskwela Kick-off Program sa Hulyo 17, 2024 sa Carmen National High School, sa Schools Division of Office (SDO) ng Cebu Province VII, at ito ay naka-live streamed sa DepEd Philippines official Facebook page.
“Regional offices and SDOs may hold their own advocacy activities in their area to launch and campaign for Brigada Eskwela,” anang memorandum.
Ang Brigada Eskwela ay ang taunang school maintenance program ng DepEd upang ihanda ang mga paaralan sa pagbabalik-eskwela ng mga mag-aaral.
Nakatakdang magbukas ang klase sa mga pampublikong paaralan sa bansa sa Hulyo 29. Umaarangkada naman na ang enrollment period para sa SY 2024-2025, na nagsimula noong Hulyo 3 at magtatagal hanggang Hulyo 26.