QCPD, handa na sa ikatlong SONA ni Pangulong Marcos

MANILA, Philippines — Tiniyak ni Quezon City Police District (QCPD) Director PBGen. Redrico Maranan na 100% na silang handa sa ikatlong State of the Nation Address (SONA) ni Pangulong Ferdinand Marcos, Jr. sa Hulyo 22.

Ang paniniyak ay ginawa ni Maranan, kasabay ng kanyang inspeksiyon sa mga kagamitan ng mga pulis, patrol cars, mga ambulance, fire trucks at drone kahapon sa Camp Karingal.

Ayon kay Maranan, magkakaroon din sila ng dayalogo sa mga magra-rally sa susunod na linggo upang masiguro  na maayos ang  kanilang protesta sa designated area. 

Sa ngayon aniya, wala pang kumukuha ng permit sa Quezon City LGU dahil ito ang magtatalaga kung saang lugar ang mga raliyista.

Nasa higit 6,000 pulis pa rin ang kanilang itatalaga sa labas ng Batasan Complex at sa ilang kalsada. Ang Sgt. at Arms ng Kamara at Presidential Security Group (PSG) ang magpapatupad ng mga security measures sa loob ng Kongreso.

Paalala pa ni Maranan sa mga raliyista, huwag gumamit ng mga t-shirt o placard na libelous upang maiwasan ang gulo gayundin ang pagsusunog ng effigy na mahigpit na ipinagbabawal sa ilalim ng BP880.