Naipit sa pamilya at pulitika – Mayor Abalos
MANILA, Philippines — “Naipit” na umano si Vice President Sara Duterte sa pagitan ng kanyang pamilya at ng kaalyado sa pulitika, kaya’t wala na siyang ibang pagpipilian pa kundi ang kumalas na sa Gabinete ni Pangulong Ferdinand Marcos Jr.
Ang pahayag ay ginawa ni Mandaluyong City Mayor Benjamin Abalos Sr. nang hingian ng pahayag ng media, sa kanyang pagdalo sa ‘MACHRA’s Balitaan’ na buwanang idinaraos ng Manila City Hall Reporters’ Asociation sa Harbor View Restaurant, sa Maynila.
Ayon kay Abalos, nakinita na niya ang pagbibitiw ni VP Sara sa Gabinete dahil na rin sa nagaganap na sigalot sa pagitan ng kanyang amang si dating Pres. Rodrigo Duterte at mga kapatid, at ni Pang. Marcos, na kaalyado naman niya sa pulitika.
“I have foreseen that,” ayon pa kay Abalos. “Nakakaawa naman siya (VP Sara). Siyempre, between your father and your family and your loyalty to the party, ‘yun ang nangyari sa kanya so, she has no alternative but to resign.”
Aniya pa, matapos ang pagbibitiw ni Duterte sa Gabinete, ay tiyak na magkakaroon ng realignments sa mga susunod na araw.
Sa katunayan nga aniya, kahit walang naganap na pagbibitiw, maaari pa ring magkaroon ng realignment dahil ang pagsasanib-puwersa aniya ni VP Sara at ni PBBM noong nakaraang eleksiyon ay pansamantala lamang.