MANILA, Philippines — Iniulat kahapon ng Department of Migrant Workers (DMW), sa pamamagitan ng kanilang Migrant Workers’ Office sa Jeddah, Saudi Arabia (MWO-Jeddah), na wala pa silang natatanggap na ulat na may Pinoy na nasugatan sa isang gusali sa central Jeddah na gumuho noong Mayo 31.
Sa ulat ng MWO-Jeddah kay DMW Secretary Hans Leo Cacdac, binisita nila ang mismong incident site at mga kalapit na pagamutan upang alamin kung may Pinoy na ginagamot doon.
Sa kabutihang-palad ay wala naman umanong Pinoy na nakabilang sa mga nasugatan sa insidente.
Batay sa ulat ng local media sa Jeddah, walong katao ang nasagip mula sa gumuhong gusali.
Tiniyak naman ng MWO-Jeddah na patuloy silang magsasagawa ng monitoring sa sitwasyon at makikipag-ugnayan sa Jeddah police, medical, at emergency services agencies upang matiyak ang kaligtasan ng mga Pinoy.