Cedric Lee naipasok na sa Bilibid

MANILA, Philippines — Kinumpirma ng ng mga opisyal ng Bureau of Corrections (BuCor) na nasa kustodiya na nila ang negosyanteng si Cedric Lee matapos i-turn over ng mga tauhan ng National Bureau of Investigation (NBI) nitong Biyernes ng gabi.

Sinabi ni BuCor Director General Gregorio Pio Catapang Jr. alas- 9:00 ng gabi nang matanggap si Lee sa New Bilibid Prison (NBP).

Bilang standard operating procedure, mananatili si Lee sa NBP Reception and Diagnostic Center (RDC) sa loob ng 60 araw.

Ang unang 5 araw ay ilalagak siya sa RDC Quarantine Cell ng walang mga pribilehiyo sa mga pagbisita.

Kasunod nito ang diagnostic procedure na kinabibilangan ng medical, sociological, psychological, educational at classification processes para sa 55 araw.

Tulad ng kanyang kapwa convicted, si Deniece Milanese Cornejo ay may Prison Number C224P-172 at Simeon Palma Raz na may N224P-2079, at si Lee na N224P-2117.

Si Cornejo ay kasalukuyang nasa RDC ng Correctional Institution for Women, habang si Raz ay nauna lamang ng isang araw sa RDC ng NBP.

Ang tatlo, kasama si Ferdinand Guerrero, ay hinatulan ng Reclusion Perpetua ng Taguig court sa kasong Serious Illegal Detention for Ransom na isinampa ng aktor /TV host na si Vhong Navarro.

Matatandaang si Lee ay hindi dumalo sa promulgation ng nasabing kaso kaya siya inisyuhan ng warrant of arrest ni Hon. Mariam G. Bien, Presiding Judge ng Taguig Regional Trial Court, Branch 153, at sa parehong araw ay sumuko siya sa NBI.