MANILA, Philippines - Maglulunsad ngayong araw ng Black Friday Protest ang grupo ng mga Koreano bilang pagkondena sa pagkidnap sa negosyanteng si Jee Ick Joo na pinaslang sa loob mismo ng PNP Headquarters sa Camp Crame.
Ayon kay Charlie Shin, Executive Vice President ng United Korean Community Association in the Philippines, bagaman tiwala silang parurusahan ng administrasyon ni Pangulong Rodrigo Duterte ang mga sangkot sa krimen partikular na ang mga pulis ay hindi maiiwasang mag-alala sila sa kanilang kaligtasan bunga ng sinapit ni Jee.
“We are afraid and we are a little bit worried. Of course, we worry about this. (But) I believe sooner the government (would) solve this problem,” pahayag ni Shin sa PNP reporters.
Kasabay nito nanawagan si Shin sa pamahalaan at publiko na makiisa sa paghahanap ng katarungan ng nagluluksang pamilya ni Jee na dinukot noong Oktubre 18, 2016 sa Angeles City, Pampanga ng walong kidnappers kabilang ang 8 pulis.
“We are foreigners but we are living here. We trust the Philippine law and the government and this incident I believe will be sooner solved and that’s why I would like to request all the Philippine authorities who are brothers and sisters please help the Korean nation especially expressing condolences to the family,” ayon kay Shin.
Inihayag ni Shin na nasa 90,000 ang mga South Korean na naninirahan sa Pilipinas habang aabot naman sa milyon ang bilang ng kanilang mga turista na bumibisita sa bansa kada taon.
“We love the Philippines. We do also many social works with our Filipino friends,” ayon pa kay Shin na 17 taon ng naninirahan sa bansa.
“I believe that this will not affect Korean tourism (in Manila) and Korean investment,” ang sabi pa nito.