‘Nasunog’ na buy-bust sinisilip sa paglikida sa 2 bebot sa Quiapo

MANILA, Philippines – Posibleng ang nasunog na buy-bust operation ang da­hilan para itumba ang dalawang babae na pinaghinalaang police ng isang sindikato ng iligal na droga, sa Quiapo, May­nila, kamakalawa ng hapon.

Sinabi ni PO3 Alonzo Layugan, ng Manila Police District-Homicide Section, na batay sa ilang impormasyon na nakuha sa cellphone ng mga biktimang sina Mercedita Calape, 32, tubong Davao City at Irene Quinto, 41, ng  Caloocan City, may ka-transaksiyon ang dalawang biktima na magkikita sa erya ng Quiapo, sa Maynila.

Patungo umano ang mga biktima sa isang restaurant sa panulukan ng Evangelista at Gonzalo Puyat (Raon) Sts., nang pagbabarilin sila ng hindi pa nakikilalang suspect.

 Batay sa footage ng closed circuit television (CCTV) naka-bull cap, na nakasuot ng kulay itim na t-shirt  ang bumaril habang naglalakad sa bangketa ang dalawa subalit hindi ito mamukhaan dahil nakatagilid.

Isa  pang lalaki ang nakita rin sa CCTV na mistulang inaantala ang paglalakad ng dalawa dahil nakaharang ito at hindi makadaan sa pagitan ng mga vendor at nakahambalang na mga paninda sa kalye ng Raon tapat ng Metro Tech Electronics.

Maging ang sinasabing boodle money o bungkos ng pera na nakasupot at dala ng mga biktima ay katulad din ng ginagamit sa buy-bust operation.

Ang dalawa ay kapwa binaril sa ulo alas- 5:15 ng hapon ng Huwebes sa mataong lugar sa Raon St., Quiapo kung saan dead on the spot at ang isa pa ay dead on arrival sa Jose Reyes Memorial Medical Center.