MANILA, Philippines – Patay ang isang hinihinalang drug pusher matapos na mauwi sa engkwentro ang buy-bust operation na isinagawa ng mga tauhan ng Marikina City Police, kamakalawa ng hapon.
Kinilala ni Marikina City Police chief Senior Supt. Vincent Calanoga, ang nasawi na si Mark James Galino, 30, residente ng R. Avenue, Sta. Cruz, Manila.
Ayon kay Calanoga, bago isinagawa ang operasyon, nakatanggap sila ng impormasyon na isang alyas James ang nagpapakalat umano ng illegal na droga sa area ng Marikina Heights.
Dakong alas-5:30 ng hapon nang isagawa ng mga tauhan ng Marikina Police Station Anti-Illegal Drugs-Special Operations Task Group (SAID-SOTG) sa pangunguna ni PO2 Ronel Agsawa, sa pakikipag-ugnayan sa Philippine Drug Enforcement Agency (PDEA), ang buy-bust operation sa Gen. Ordoñez St., Marikina Heights, Marikina City.
Binentahan umano ng suspek ng shabu na nagkakahalaga ng P1,000 ang poseur buyer.
Gayunman, sa kalagitnaan ng transaksyon ay nakatunog si Galino sa operasyon sanhi upang magbunot ito ng .38 kalibre ng baril, kaya’t binaril ito ng pulis bilang depensa sa sarili.
Narekober ng mga awtoridad mula sa suspek ang mga piraso ng heat sealed transparent plastic sachet na may lamang hinihinalang shabu, apat na piraso ng live ammunition ng .38 kalibre ng baril; isang bala
ng kalibre .45, digital weighing scale, at isang UNIQUE Cal. 38 pistol na may isang magazine.