MANILA, Philippines – Patay ang isang sinasabing tomboy makaraang tumungga ng botelya ng silver cleaner dahil sa umano’y matinding selos, kahapon ng umaga sa Caloocan City. Hindi na umabot ng buhay sa Manila Central University Hospital ang biktimang si Rea Zapanta, 23, dalaga, walang trabaho, at residente ng Velasco Street, Brgy. 7 Sangandaan, ng naturang lungsod.
Sa ulat ng pulisya, dakong alas-5:30 ng madaling araw nang matagpuan ang biktima na bumubula ang bibig sa loob ng bahay nito. Nabatid sa imbestigasyon na unang nakipag-inuman ang nasawi sa umano’y karelasyon nito na si Rose Maine Maninang, 21, isang dancer sa nightclub, at iba pang mga kaibigan sa loob ng bahay ni Zapanta.
Nang malasing na, bigla umanong pinagselosan ng biktima ang isang kainumang lalaki hanggang sa umalis ito sa umpukan at lumaklak ng lason. Huli na nang madiskubre ng mga kainuman ang katawan ng biktima at natagalan na maisugod ito sa pagamutan.