MANILA, Philippines - Dalawang bala sa ulo ang naging dahilan ng pagkasawi ng isang negosyante nang tambangan ng isang hinihinalang gun-for-hire matapos magsimba sa Malate Church, sa Malate, Maynila, kamakalawa ng gabi.
Hindi na naisalba pa ng mga doktor sa Philippine General Hospital (PGH) ang biktimang si Nora Eubanas, 71, residente ng #1827 Taft Ave., Malate, Maynila habang sugatan naman ang apo nito na si Mikhael Eubanas, 22, makaraang tamaan ng basag na salamin ng minamanehong Ford Lynx (XDN-719).
Sa ulat ni SPO2 Jonathan Bautista ng Manila Police District-Homicide Section, dakong alas-6:45 ng gabi nang maganap ang pananambang sa harapan ng Malate Church na nasa M.H. Del Pilar, Malate.
Nabatid na bukod sa nag-drive na si Mikhael, kasama rin ng biktima ang kapatid niyang si Adella Euchanico.
Sa imbestigasyon, kalalabas lamang ng simbahan ng biktimang si Nora at papasakay sana ng kanyang kotse nang may biglang lumapit na lalaki at pinaputukan ng dalawang ulit ang biktima bago naglakad lamang papalayo ang gunman.
Lumalabas na si Nora lamang ang target ng suspek dahil si Adella at ang apo ay hindi naman binaril ng suspek. Naniniwala si Bautista na malalim ang motibo sa krimen at maaring may alam ang pamilya ng biktima sa motibo ng pamamaslang.