MANILA, Philippines – Dead-on-the-spot ang isang 32-anyos na ginang na binaril nang malapitan ng hindi pa nakilalang gunman, habang naglalakad sa Quiapo, Maynila, kahapon ng umaga.
Agad namang kinilala ng mga kaanak ang biktimang si Jennifer Sulayman, residente ng Basan St., Quiapo, sanhi ng tama ng bala sa katawan.
Kaswal lamang na naglakad papalayo ang suspek na inilarawan ng pulisya sa edad na 35, may taas na 5’5’’, nakasuot ng kulay itim na jacket, maong pants at armado ng hindi nabatid na kalibre ng baril.
Sa ulat ni SPO3 Glenzor Vallejo, ng Manila Police District-Homicide Section, dakong alas-6:40 ng umaga nang maganap ang pamamaril sa tabi ng ilog Pasig sa Basan St., Quiapo.
Pauwi na umano sa bahay ang biktima nang biglang lumutang ang suspek sa kaniyang likuran at paputukan ng dalawang ulit ang una sa katawan. Duguan na itong humandusay.
Blangko pa ang pulisya sa motibo ng krimen.