Motorsiklo vs jeep; 1 patay, 1 sugatan
MANILA, Philippines – Lasog ang isang rider habang sugatan ang angkas nito matapos sumalpok ang sinasakyan nilang motorsiklo sa nakasalubong na pampasaherong jeep, kamakalawa ng gabi sa Malabon City.
Nakilala ang nasawi na si Edmund Daguno, habang sugatan naman ang angkas nitong si Richard Minerva, na ginagamot sa Philippine Orthopedic Center na nagtamo naman ng sugat at pilay sa katawan.
Nakakulong ngayon sa detention cell ng Malabon City Police si Reynaldo Aguilar.
Base sa isinagawang imbestigasyon ni SPO2 Francisco Versoza, ng Malabon City Police, Traffic Bureau, naganap ang insidente alas-10:45 ng gabi sa panulukan ng M.H. del Pilar at Mesina Sts., Brgy. Tinajeros ng nasabing lungsod.
Nabatid na angkas ni Daguno si Minerva sa motorsiklong minamaneho nito, Suzuki Fury at habang binabagtas ang naturang lugar ay bigla na lamang sumalpok sa kasalubong na pampasaherong jeep (TBS-219).
Tumama ang ulo ni Daguno sa salamin ng sasakyan ni Aguilar at humataw pa ito sa window steel frame na naging dahilan ng pagkawasak ng kanyang mukha, habang tumilapon naman ang angkas nitong si Minerva sa kalsada.
- Latest
