MANILA, Philippines – Pinatay muna sa saksak ng isang lalaki ang kanyang live-in partner bago ito nagtangka ring magpakamatay sa pamamagitan ng paglaslas sa leeg dahil sa matinding selos sa harapan mismo ng kanilang 5-anyos na anak na lalaki sa Caloocan City kahapon ng umaga.
Dead on-the-spot sanhi ng mga saksak sa iba’t ibang bahagi ng katawan ang biktimang si Heidi Remamocha, 26, residente ng Tamban St., Brgy. 18 ng nasabing lungsod.
Inoobserbahan naman sa Caloocan City Medical Center ang suspek na si Nelson Mapag, 25, naninirahan din sa naturang lugar.
Ayon sa Station Investigation Division (SID) ng Caloocan City Police naganap ang insidente alas-9:30 ng umaga sa loob ng tinitirhan ng mag-live-in sa nabanggit na lugar.
Nabatid na unang nagkaroon ng mainitang pagtatalo ang mag-live-in dahil umano sa pagseselos ng suspect.
Sa kainitan ng pag-aaway ay kumuha ng kutsilyo ang suspek at pinagsasaksak ang biktima na nang duguang humandusay ay saka naman naglaslas ng leeg ang una.
Naganap ang insidente mismo sa harapan ng limang taong gulang nilang anak na lalaki.
Agad namang sumaklolo ang mga kapitbahay ng mag-live-in partner at agad na dinala sa nabanggit na pagamutan si Mapag.
Nabatid pa sa mga kamag-anak ni Remamocha, na gumagamit umano ng illegal na droga si Mapag dahilan upang palaging mainit ang ulo nito at laging tamang hinala ito sa biktima.