MANILA, Philippines - Utas ang isang 48-anyos na barker nang barilin ng isang driver ng jeep na isa palang pulis, kaugnay sa panghahablot ng bag at pananapak ng una sa huli sa Tondo, Maynila, kamakalawa ng gabi.
Kinilala ang nasawi na si Nestor Obequias, alyas Bong, ng Padre Ortega St., Tondo.
Isinasailalim na sa interogasyon sa Manila Police District-Homicide Section ang suspek sa pamamaril na si SPO1 Resty Castillo, nakatalaga sa Traffic Bureau ng Northern Police District-Navotas Police Station, residente ng Lapu Lapu St., NBBS Boulevard, Navotas Metro Manila.
Sa ulat ni SPO1 Milbert Balinggan ng MPD-Homicide Section, dakong alas-7:30 ng gabi nang maganap ang nasabing insidente sa panulukan ng N. Zamora at Morga Sts., sa tapat ng simbahan ng Tondo.
Nabatid na si SPO1 Castillo ay nagsa-sideline bilang jeepney driver ng biyaheng Dagat Dagatan – Divisoria (TUJ-802).
Nang magbabaan na ang lahat ng pasahero ay lumiko na ito para bumalik sa Navotas ang jeep subalit sumakay pa umano ang biktima sa tabi ni Castillo at biglang hinablot ang maliit na bag na pinaglalagyan ng kita ng driver.
Dahil sa hindi umano nakuha ang pera ay sinapak ng biktima ang driver sa bibig hanggang sa mapilitang barilin ang biktima na tumama malapit sa kanang kili-kili na tumagos sa kaliwang bahagi ng likod.
Dead on the spot ang barker, habang ang driver na pulis ay kusa namang sumuko sa MPD-station 2.