Truck hulog sa creek: 3 sugatan
MANILA, Philippines - Sugatan ang tatlong katao nang mahulog ang sinasakyang 14-wheeler truck sa isang creek sa may southbound lane ng C-5 Road sa Taguig City, kahapon ng madaling-araw.
Ayon sa ulat ng Taguig City Traffic Bureau, ang driver na si Ben Helsano at dalawang pahinante nito ay nasugatan sa nasabing insidente na naganap alas-3:00 ng madaling- araw sa harapan ng Libingan ng mga Bayani sa south-bound lane ng kahabaan ng C-5 Road ng naturang siyudad.
Nabatid kay Helsano, minamaneho niya ang 14-wheeler truck kasama ang kanyang dalawang pahinante at may karga na mga metal scraps na nagmula sa Valenzuela City at dadalhin sa San Pedro, Laguna.
Idinagdag nito, iniwasan niya ang isang trak na nag-u-turn, ngunit nawalan siya ng kontrol sa manibela dahil sa madulas na kalsada sanhi nang pag-ulan kaya sila nagtuluy-tuloy sa creek. Inabot din ng mahigit isang oras bago naiangat ang naturang truck sa creek.
Nagdulot naman ng bahagyang pagsisikip sa daloy ng trapiko sa naturang lugar ang aksidente.
- Latest
