MANILA, Philippines - Utas sa 20 saksak ang isang 21-anyos na salesboy habang ang kasamang saleslady nito ay kritikal naman sa 4 na saksak nang atakehin ng live-in partner ng huli na nagselos makaraang maaktuhang magkasama ang dalawa sa Sta. Cruz, Maynila, kamakalawa ng gabi.
Dead-on-arival sa Jose Reyes Memorial Medical Center (JRMMC) ang biktimang si Jesper Puyat, binata, ng Sta. Cruz, Maynila habang nasa malubhang kalagayan pa dahil sa mga tinamong saksak ang kasamahan nitong saleslady na si Rosemarie Badiola, 21.
Arestado naman ang suspek na kinilalang si Ruel Maghuyop, 21, namamasukan sa call center, at residente rin sa Sampaloc, Maynila nang makorner ng mga barangay tanod at ng Alvarez-Police Community Precinct .
Sa ulat ni PO3 Marlon San Pedro, ng Manila Police District-Homicide Section, dakong alas-8:15 ng gabi, nang maganap ang nasabing insidente sa labas ng Odeon Terminal Mall.
Sa imbestigasyon, nagseselos umano ang suspek dahil hindi natulog sa kanyang piling ang kinakasamang si Badiola nitong nakalipas na Lunes at sa pagtatanong ay nalaman umano na nakitulog sa boarding house ni Puyat na naging dahilan ng kanilang pag-aaway.
Sinabi ng suspek na may anak silang babae na nasa 5-buwan na.
Anang suspek, nang magtapat ang kinakasama na may iba na itong mahal ay gumuho ang kanyang pangarap at nawalan ng saysay ang pag-iipon ng pera para sa binyag ng anak at kasal nila lalo na nang maaktuhan niyang naglalambingan habang naglalakad ang dalawa nang puntahan niya sa trabaho.