MANILA, Philippines – Nag-uumpisa nang maagnas ang bangkay ng babaeng Tsinoy nang madiskubre sa loob ng kanyang bahay makaraang umalingasaw ang masangsang na amoy kahapon ng umaga sa Malabon City.
Kinilala ng pulisya ang biktima na si Remedios Uy, 52, ng Phase 3, Brgy. Longos sa naturang lungsod.
Lumitaw sa imbestigasyon ng pulisya, bandang alas-10 ng umaga nang makaamoy ng mabaho ang mga kapitbahay mula sa bahay ni Uy.
Kaagad naman itinawag sa pulisya ang insidente dahil sa masangsang na amoy na sinasabing may masamang nangyari kay Uy.
Nang pasukin ng mga pulis ang bahay, bumulaga ang bangkay ni Uy na nakahandusay.
Nabatid na huling nakitang buhay ang biktima noong Sabado na naglalakad malapit sa kanyang bahay.