Taxi nagliyab sa EDSA

MANILA, Philippines - Masuwerteng naka­ligtas ang driver ng isang taxi at pasahero nito ma­karaang biglang magliyab ang kanilang sinasakyan habang tina­tahak ang kahabaan ng EDSA sa Balintawak, Quezon City kahapon ng umaga.

Sa ulat ni Supt. Jesus Fernandez, city fire marshal, ang nasunog ay ang MGE taxi (UVH-789) na minamaneho ng isang Angelo Acob, 31.

Naglagablab ang nasabing sasakyan sa may tapat ng isang supermarket sa EDSA, Balintawak ganap na alas-9 ng umaga.

Ayon kay Acob, sakay niya ang dalawang pasahero at binabagtas ang nasabing lugar nang mapuna niyang umuusok ang hood nito.

Dahil dito, nagpasya siyang ihinto ang taksi para tignan ang makina nito, pero hindi pa umano siya nakababa ay bigla itong naglagablab dahilan para agad silang magsipagbabaan ng kan­yang mga pasahero.

Sabi ni Fernandez, sa engine compartment ng taxi nagsimula ang apoy na posibleng nag-ugat sa electrical wiring nito.