Selos dahilan sa pagpaslang sa mag-ina sa BGC

MANILA, Philippines – Nadakip na ang suspek sa likod ng pagpaslang sa mag-inang natagpuang patay sa kahabaan ng C5 Road sa Taguig City malapit sa Treston International College sa Bonifacio Global City kagabi.

Selos ang tinitignang anggulo ng mga pulis na motibo sa pagpaslang ng suspek na tubong Zamboanga Del Norte na si Danny Belono na nasakote bandang alas-10 kagabi.

Nakilala naman ang mga biktimang sina Jonalyn Gantiao at apat-na-taong gulang niyang anak na si Gwen Angel na kapwa taga Mahogany Homes Mini-Park, Taguig City.

Kaugnay na balita: Bangkay ng mag-ina natagpuan sa BGC

Nasakote ang suspek sa isinagawang follow-up operation ng Taguig City police.

Nakatulong sa imbestigasyon ng mga awtoridad ang naging salaysay ng isang binatilyong testigo na nakitang magkakasama ang tatlo bago matagpuan ang bangkay ng mag-ina.

"The witness saw the woman who was holding the child, talking with the man while they were seating on the pavement gutter," pahayag kahapon ni Southern Police District (SPD) director  Chief Superintendent Jose Erwin Villacorte.

Nakitaan ng sugat sa ulo si Gantiaw na hinala ng mga pulis ay nakuha sa paghampas ng matigas na bagay

May natagpuan ding bato na may bahid ng dugo malapit sa bangkay ng mga biktima.