AWOL na pulis, 3 pa naaktuhan sa shabu

MANILA, Philippines - Apat katao kabilang ang isang AWOL na pulis ang arestado matapos maaktuhan ang mga ito na sumisinghot ng shabu, kahapon sa Malabon City.

Kalaboso sina dating PO1 Ollan de Guzman; Leonidez Mendoza, 36; Romma Villanueva, 22, at Bernie Ulit.

Nabatid na nakatanggap ng impormasyon ang mga pulis ng Malabon na ginagawang singhutan ng shabu ang bahay ni Mendoza sa  P. Bautista St., Barangay Niugan ng naturang lungsod dahilan upang magsagawa ng anti-drug operation ang mga kagawad ng Malabon City Police alas-12:45 ng madaling araw sa naturang lugar.

Dito ay naaktuhan ang mga suspek na bumabatak ng shabu kung saan nakuhanan ng apat na sachet at mga paraphernalia na naging dahilan upang dalhin ang mga ito sa presinto.

Lumalabas na mula noong 2011 ay hindi na pumasok si de Guzman sa Camp Bagong Diwa sa Taguig City na naging dahilan upang isama sa mga Absent Without Official Leave.