Professor inireklamo ng pananakit ng 4th year student

MANILA, Philippines - Nahaharap ngayon sa kasong criminal ang isang propesor dahil sa sinasabing pananakit sa isang 4th year student ng Technological Uni­versity of the Philippines o TUP.

Ayon kay PO1 Edith Cha­vez ng MPD Women’s and Children’s Desk na mga ka­song grave threat, physical injury at paglabag sa Re­public Act 9262 o anti vio­lence against children and women ang kinakaharap sa piskalya ng Maynila ni Michael Villadolid, 25, professor ng  Art Education sa TUP Manila.

Batay sa imbestigasyon,  alas-3:00 ng hapon Enero 13, pinapunta umano ni Villa­dolid sa Araullo High School sa United Nations Avenue, Manila ang biktimang si Danna Castillo, 20, 4th year computer engineering student sa  TUP at umano ay girlfriend ng suspek.

Gayunman, sa hindi ma­lamang dahilan ay nagtalo umano ang dalawa hanggang sa saktan ng suspek ang bik­tima na agad na naghain ng reklamo sa pulisya.

Nabatid rin na tinangkang kunin ng mga awtoridad ang panig ng propesor ngunit umano ay hindi na ito makita.

Ang nasabing reklamo ay sinampa na sa prosecutor’s office ng Lungsod ng Maynila.