Motorsiklo vs bisikleta: Lolo patay

MANILA, Philippines - Isang hindi pa nakikilalang lalaki  ang nasawi  nang mahagip ng humaha­gibis na motorsiklo ang kanyang sinasakyang bisikleta kamakalawa ng umaga sa may Araneta Avenue sa lungsod Quezon. 

Sinabi ni SPO4 Raymundo Layug, alas-5 ng umaga  ng Sabado kahapon nang bawian ng buhay ang  matanda  habang nilalapatan ng lunas sa Quezon City General Hospital.

 Anya, ang biktima ay may edad  60 hanggang 70-anyos, nasa 5’5” ang taas, kayumanggi  at naka­suot ng puting t-shirt at short pants nang maaksidente.

Ayon sa pulisya, ang driver ng motorsiklo na isang Joey Reyes, 29, ay nasa kustodiya na ng pulisya at takdang kasuhan ng reckless imprudence resulting to homicide.

Sinasabing may  iniwasang sasakyan ang motorsiklo kaya’t natumbok nitong mahagip ang matanda na noon ay nagbibisikleta sa nabanggit na lugar.