Guro sa Maynila libre sa sinehan

MANILA, Philippines - Maaaring  nang malibre sa  mga sinehan  sa Maynila ang mga public schools  teachers ng lungsod.

Ito’y sakaling pumasa ang ordinansang inihain  ni Manila 4th District Councilor Don Juan ‘DJ’ Bagatsing sa konseho na tatawaging ‘Manila Public School Teachers’ Cinema Consolation’.

Naniniwala si Bagat­sing, na marapat lamang na bigyan  konsolasyon ang  mga guro sa pama­magitan nito dahil malaki ang naitutulong ng mga ito sa  lungsod ng Maynila.

Nakasaad sa ordinansa na maaaring makapanood ng  sine, dalawang beses sa isang buwan ang  guro na nagtuturo pa at may kaukulang identification cards.

Gayunman hindi maaa­ring gamitin ang prebilehiyo sa mga premier nights, sneak previews o first day showing.

Inaatasan din ng ordi­nansa ang  Manila Division of City Schools at Manila Social Welfare Department  na magkaroon ng koordinasyon hinggil sa pag-iisyu ng  special Movie card sa  mga kuwalipikadong guro.

Paliwanag ni Bagat­sing, sa oras na lumusot sa konseho ang ordinansa kailangan aniyang ipatupad ito sa loob ng 15 araw.

Ang sinumang lalabag ay  maaaring makulong  ng   isang taon o pagmumultahin ng P5,000.