MANILA, Philippines - Isang 32-anyos na lalaki ang napatay, habang sugatan din ang kasama nito nang resbakan ng kalaban ng una sa Sta. Ana, Maynila, kahapon ng hapon.
Kinilala ang biktimang si Dominador Macandog, habang nagtamo naman ng isang bala sa braso ang kasamang si Cesar Collado, 50, kapwa residente ng Raduim St., Sta. Ana, Maynila.
Tinutugis naman ng mga awtoridad ang suspect na si Gil Valdemar, alyas Pilo, ng Road 16 Fabie Estate , Paco, Maynila.
Sa ulat ni PO3 Richard Limuco, ng MPD-Homicide Section, dakong alas-12:20 ng hapon nang maganap ang nasabing krimen sa Radium St., sa may Dagonoy St., Sta. Ana.
Nagkukuwentuhan lamang umano sina Macandog at si Collado sa nang sumulpot ang nasabing suspect at mabilis pinaputukan ang una, habang ligaw na bala naman ang tumama kay Collado.
Nabatid na matagal nang magkaaway si Macandog at suspect at naghaharap pa umano ang mga ito sa korte kaugnay sa kanilang demandahan.