Lalaki nagpasagasa sa MRT

MANILA, Philippines - Isang hindi pa nakikilalang lalaki ang nasawi makaraang tumalon sa riles at magpasagasa sa tren ng Metro Rail Transit (MRT 3) sa Guadalupe Station sa Makati City kahapon ng umaga.

Ayon sa ulat, dakong alas-8:15 ng umaga­ nang tumalon ang lalaki na nasa edad 20-30 anyos, nakasuot ng asul na t-shirt at shorts sa northbound rail track o patungong Cubao.

Pumailalim ang biktima sa ikalawang coach ng tren at nakaladkad ng halos 30 metro.

Dahil dito, kalunos-lunos ang sinapit ng biktima nang madurog ang katawan at ulo sa pagkakakaladkad.

Kitang-kita naman sa kuha ng closed circuit television (CCTV) ang pagtalon ng biktima, ayon kay MRT Gen. Manager Al Vitangcol.

Dahil dito, higit tatlong oras na natigil ang operasyon ng MRT at libu-libong pasahero ang na-stranded habang iba ang nagpasya na maglakad sa riles at sumakay na lamang ng bus.

Nabatid na dakong alas-11:15 na ng umaga­ nang matanggal ang bangkay at madala sa Veronica Funeral Homes ang labi nito habang hinihintay ang mga kapamilya nito.  Tanging isang susi sa bulsa ng shorts nito lamang ang nakuha na maaaring magamit sa pagkilala dito.

Sa harap ng mga tumataas na kaso ng pagpapakamatay sa MRT at LRT, pinag-aaralan na ngayon ang paglalagay ng barrier at passenger door sa mga platform tulad ng sistema sa ibang bansa.