Computer programmer, kritikal sa houseboy
MANILA, Philippines - Nasa kritikal na kondisyon ang isang binatang computer programmer makaraang pagsasaksakin ng kanilang houseboy kamakalawa ng gabi sa Parañaque City.
Nakaratay ngayon sa University of Perpetual Help Medical Center ang biktimang si Michael Jude Suarez, 31, ng Jerusalem St., Multinational Village, Brgy. Moonwalk, ng naturang lungsod.
Nakatakas naman ang suspek na nakilalang si Jeofrey Suamer, tubong-Malabon City at stay-in helper sa loob ng bahay ng biktima.
Sa ulat ng Parañaque City Police, positibong kinilala ni Gerald Paran, kaibigan ng biktima, ang suspek na si Suamer na siyang nakita niyang nagmamadaling lumabas ng bahay na duguan dakong alas-10 kamakalawa ng gabi.
Ayon kay Paran, bibisitahin niya ang kaibigan nang makasalubong si Suamer at tinanong pa niya kung saan pupunta ngunit hindi siya sinagot. Nang pumasok siya sa bahay, dito niya nakita ang duguang kaibigan na nakalugmok sa loob ng bahay. Agad naman itong nagpasaklolo sa mga kapitbahay at isinugod sa pagamutan ang biktima.
Blangko pa naman ang pulisya sa motibo ng naturang krimen dahil sa hindi pa makunan ng pahayag ang biktima na hindi pa nagkakamalay.
- Latest
