MANILA, Philippines - Palaisipan ngayon ang pagkasawi ng isang negosyanteng babae makaraang matagpuan ang bangkay nito sa loob ng kanyang bahay, kamakalawa ng gabi sa Mandaluyong City.
Nakilala ang nasawi na si Maricel Torres, 34, pansamantalang naninirahan sa Brgy. Poblacion, ng naturang lungsod.
Sa ulat ng Mandaluyong City Police, nadiskubre ang bangkay ni Torres ng live-in partner nito na si Ronald Pikit Pikit, 35, dakong alas-9:30 ng gabi sa loob ng bahay nito.
Ayon kay Pikit Pikit, iniwan niya at ng kasambahay na si Celsa Calago na mag-isa si Torres sa loob ng bahay dakong alas-8 ng umaga at nang bumalik ay nagulat sila nang madiskubreng wala na itong buhay sa loob ng kuwarto nito.
Sa inisyal na pagsusuri sa katawan ng biktima, walang nakitang anumang sugat sa bangkay na dahilan ng pagkasawi nito. Ngunit sa kabila nito, isasailalim pa rin sa awtopsiya ang bangkay na umano’y 10 oras nang patay bago madiskubre nina Pikit Pikit at Calago upang mabatid ang tunay na sanhi ng pagkamatay at makumpirma kung may naganap na foul play.