MANILA, Philippines - Dahil umano sa pagiging lasenggo, nagawang saksakin hanggang sa mapatay ng kanyang misis ang isang mister habang nasa kasarapan ng pagtulog ang huli, kamakalawa ng gabi sa Makati City.
Nakilala ang nasawi na si Octavio Elayda, Jr., 36, security inspector ng Superior Security Services, Inc., at naninirahan sa Brgy. Olympia, ng naturang lungsod.
Agad namang nadakip ang misis na suspek na nakilalang si Annalyn Elayda, 32, na nahaharap sa kasong parricide.
Sa ulat ng Makati City Police, naganap ang pananaksak sa biktima dakong ala-1:30 ng madaling-araw sa loob ng kanilang bahay habang mahimbing na natutulog ang biktima.
Nauna rito, nakikipag-inuman ang mister sa kapitbahay nang dumating ang misis na si Annalyn at sa harap ng mga kabarkada ay inutusan itong umuwi na. Dahil sa napahiya, nagalit ang biktima na nagresulta sa pagtatalo ng mag-asawa hanggang sa kanilang pag-uwi.
Gayunman, nang natutulog na ang mister ay dito ito sinaksak ng galit pa ring misis hanggang sa mapatay.