Laing pangilad na sad

Human mapadad-ig subpoena si Vice President Sara ‘Inday’ Z. Duterte aron paesplikaron ug imbestigahan bahin sa iyang pagpahibalo sa publiko nga ingkaso’g patyon ug mamatay siya, aduna na siyay tawong gikasabot nga mopatay sab nila ni  Presidente Bongbong Marcos Jr. (PBBM), First Lady Liza Araneta ug House Speaker Martin Romualdez, didto sa EDSA Shrine nag-abot-abot-nagakadaghan sab ang diehard Duterte supporters (DDS) lakip na pari, bishop ug cardinal gikan sa nagkadaiyang dapit sa  Luzon, Visayas, Mindanao ang mitungha.

Gumikan niini, kalit lamang, may mi-leak mensaheng gituohang gikan ni PBBM nga gipadala ngadto sa usa ka political vlogger, kinsa mi-post niini sa social media.

Aniang unod: “In the larger scheme of things, Sara is unimportant. So please do not file impeachment complaints. It will only distract us from the real work of governance which is to improve the lot of all Filipinos.”

Daghang netizen nga nakabasa ang nakasaway-nakapangyamiid-mibatikos ni PBBM.

Sanglit sila nahutdan nag pagsalig niining gtuohan nilang bangag nga pangulo, kinsa trinilyon ang giutang matag tuig ug binilyon ang pundo nga gigamit alang sa ilang confidential funds, flood control projects ug ubang mga proyekto nga kutob ra sa laway, pero wala gyoy bisan usa ka lehitimo-dakong inprastraktura nga napabarog, 

Unya gusto na sab siyang mangilad? Nagtuo ba siya nga ning paghingalan niyag ‘unimportant’ ni Inday, makaani siyag simpatiya sa hagbay rang gidaugdaog niyang mga kabos, diin inay maoy palamboon ang atong agricultural lands, mao na hinuoy gipadaghan ang illegal drugs, adik-adik ug mga kriminal?

Sa mensahe, iyang giawhag hingtungdang institusiyon-ahensiya nga dili na mo-file og impeachment complaints batok kang Inday kay makaguba lamang kuno sa ilang tiunayng pagpangalagad sa gobiyerno kang kansang tumong mao ang pagpalambo sa kinabuhi-panginabuhian sa katawhan?

Mao ba, PBBM? Unya, nganong wala man nimo kini buhata? Gipasagdan ra man hinuon nimo si Inday Sara?

Pastilan, niining imong gibuhat, sama ra bayang giangkon nimong, usa ka sa mga author nga ipa-impeach ni Inday. Pero sanglit imong natimahoan nga tagilid na mo, importanteng molaylo!

Mapugngan pa kaha ang padayong pagdagsang diha sa EDSA sa mga biktimang Pinoy, kinsa imong nabudol ug nagplanong magmartsa paingon sa Malakanyang aron ikaw, palayason?

Na hala, paabota sila, PBBM!